पिंपरी : पिंपरी-चिंचवडचे माजी नगरसेवक आणि भाजपचे प्रदेश पदाधिकारी रामकृष्ण गोविंदस्वामी पिल्ले उर्फ राजेश पिल्ले यांच्यावर पुण्यातील चंदननगर पोलीस ठाण्यात शुक्रवारी (दि.७) १५ कोटींची फसवणूक केल्याचा गुन्हा दाखल करण्यात आला आहे.
या प्रकरणी संजय दयानंद ओसरमल (वय ३९, रा.पिंपरी) यांनी चंदननगर पोलीस ठाण्यात शुक्रवारी (दि.७) तक्रार दिली आहे. ही फसवणूक ५ फेब्रुवारी २०१९ ते मे २०२२ या कालावधीत झाली आहे. पोलिसांनी दिलेल्या माहितीनुसार, राजेश पिल्ले हे ब्रह्माकॉर्प लिमिटेडतर्फे अधिकृत संचालक रामकुमार अग्रवाल यांच्यातर्फे जमीन खरेदी विक्री व्यवहारांमध्ये प्रिसिपल एजंट (विश्वस्त प्रतिनिधी) म्हणून काम करत असून पिल्ले यांनी पुण्यातील चरवली बुद्रुक येथील सर्वे नंबर २१० हिस्सा नंबर ६ मधील एकूण ९५ आर ही मिळकत कंपनीचे संचालक रामकुमार ब्रह्मदत्त अगरवाल यांना कोणतीही पूर्वकल्पना न देता परस्पर संतोष सोपानराव लांडगे व धनंजय हनुमंत लांडगे (रा. पिंपरी) यांना खरेदीखत करत १५ कोटींना विकली.
त्यामुळे ब्रह्माकॉर्प कंपनीचा विश्वासघात करून १५ कोटी रुपयाचा अपहार करत स्वतःच्या आर्थिक फायद्यासाठी कंपनीची फसवणूक केली म्हणून पिल्ले यांच्यावर गुन्हा दाखल क़रण्यात आला आहे. अद्याप पिल्ले यांना अटक झाली नसून चंदननगर पोलीस पुढील तपास करत आहेत.
--
Reviewed by ANN news network
on
१०/०८/२०२२ ०९:३८:०० AM
Rating:
कोणत्याही टिप्पण्‍या नाहीत: